3 John
1Izaho loholona mamangy an’i Galo malala, ilay tiako amin’ny fahamarinana. 2Ry malala, mivavaka aho mba hambinina amin’ny zavatra rehetra ianao ary ho salama, toy ny hanambinana ny fanahinao. 3Fa nifaly indrindra aho fony nisy rahalahy tonga ary nijoro vavolombelona tamin’ny fahamarinanao, tahaka ny andehananao amin’ny marina. 4Tsy manana hafaliana be noho ity aho, dia ny mandre fa mandeha amin’ny fahamarinana ireo zanako. 5Ry malala, manao asa mahatoky ianao na amin’ny inona na inona asa ataonao ho an’ireo rahalahy sy ireo vahiny, 6izay nijoro vavolombelona ny fitiavanao teo anatrehan’ny fiangonana. Soa no ataonao raha alefanao mandeha amin’ny fomba mendrika an’ Andriamanitra izy ireo, 7satria nohon’ny anarana no nialany, tsy nitondra na inona na inona avy tamin’ireo Jentilisa. 8Noho izany isika dia tokony handray ny tahaka izany, mba ho mpiara-miasa amin’ny fahamarinana isika. 9Nanoratra zavatra tamin’ny fiangonana aho, kanefa Diotrefa, ilay te-ho lohany amin’izy ireo, dia tsy nandray anay. 10Noho izany, raha tonga aho, dia ho tsaroako ireo asa izay nataony, ny fomba nilazany zavatra mahatsiravina manohitra anay miaraka amin’ny teny ratsy. Tsy afa-po tamin’ireo asa, dia tsy nandray ireo rahalahy izy. Nandrara ireo izay te-hanao toy izany izy ary nandroaka azy ireo hivoaka ny fiangonana. 11Ry malala, aza maka tahaka izay ratsy fa izay tsara. Ilay iray izay manao ny tsara dia an’Andriamanitra; ilay iray izay manao ny ratsy dia tsy nahita an’Andriamanitra. 12Ny rehetra sy ny fahamarinana dia vavolombelona manambara an’i Demetrio. Izahay ihany koa dia mijoro vavolombelona, ary fantatrao fa marina ny fanambaranay. 13Nanana zavatra betsaka ho soratana aminareo aho, fa tsy maniry hanoratra ireo aminareo amin’ny penina sy ranomainty aho. 14Kanefa aho manantena hahita anareo tsy ho ela, ary hiresaka mivantana isika. 15Ho aminareo anie ny fiadanana. Manao veloma anao ireo sakaiza aty. Veloma any amin’ireo sakaiza tsirairay araka ny anarany avy.
Copyright information for
PltULB